ताई : त्याला पाजलेंहि नाहीं, नीट पाहिलेंहि नाहीं. आईनें नेलें.
आई : ने लौकर. बोलायची वेळ नाहीं.
दुसरा : मांजरें बाहेर भांडत आहेत !
आई : मुलाचें रडणें ऐकूं जाणार नाहीं.
दुसरा : चल रे.
आई : सावधपणें जा. काळोख आहेच. सावासारखे जा. चोरासारखे जाऊं नका. मी दार लावून घेतें.
पहिला : कठीण काम !
दुसरा : ही सनातन संस्कृति !
पहिला : तिचीं फळें देवाच्या चरणीं वाहूं.
दुसरा : सनातन संस्कृति देवासाठींच आहे. मानवासाठीं नाहीं.
पहिला : मुकाट्यानें चला.
दुसरा : कोण आहे तें ? आपल्यापाठीमागून कोणी येत का आहे ?
पहिला : कोणी येत नाहीं.
दुसरा : एवढ्या रात्रीं नारोशंकरी घंटा कोण वाजवीत आहे ?
पहिला : कोणी देवाचा भक्त! पाप करुन आला असेल व '' पाहि मां '' म्हणत असेल ?